« ពិព័រណ៍ពាណិជ្ជកម្មកម្ពុជា លើកទី១៨ » (CTExpo)
«ពិព័រណ៍ពាណិជ្ជកម្មកម្ពុជា» (CTExpo) លើកទី១៨ នឹងត្រូវរៀបចំចាប់ពីថ្ងៃទី៤-៧ ខែធ្នូ ឆ្នាំ២០២៥ នៅសាលសន្និបាត ភីអេច ហ្គ្រេនហល បុរីប៉ងហួតបឹងស្នោ រាជធានីភ្នំពេញ ព្រះរាជាណាចក្រកម្ពុជា ក្រោមមូលបទ «យុគសម័យថ្មីនៃពាណិជ្ជកម្ម ២.០»។ ក្រសួងពាណិជ្ជកម្ម គ្រោងគោរពអញ្ជើញ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ផ្តល់កិត្តិយសអញ្ជើញចូលរួមជាអធិបតីដ៏ខ្ពង់ខ្ពស់ក្នុងពិធីបើកសម្ពោធពិព័រណ៍ ព្រមទាំងគ្រោងអញ្ជើញ ឯកឧត្តម-លោកជំទាវ តំណាងក្រសួង-ស្ថាប័ន អង្គទូតនានាប្រចាំព្រះរាជាណាចក្រកម្ពុជា ដៃគូអភិវឌ្ឍន៍ សមាគមធុរកិច្ចនៅកម្ពុជា តំណាងក្រុមហ៊ុន សហគ្រាស និងវិស័យឯកជនពាក់ព័ន្ធ សរុបប្រមាណ៥០០នាក់។
ក្នុងឆ្នាំនេះផងដែរ ការរៀបចំ «ពិព័រណ៍ពាណិជ្ជកម្មកម្ពុជា» (CTExpo) លើកទី១៨ គ្រោងយកមូលបទ “យុគសម័យថ្មីនៃពាណិជ្ជកម្ម ២.០” តំណាងឱ្យការបន្តស្តារឡើងវិញ និងការរីកចម្រើននៃពាណិជ្ជកម្មរបស់កម្ពុជា ដែលបង្ហាញពីសករាជថ្មីនៃការអភិវឌ្ឍ សេដ្ឋកិច្ច ការចូលរួមជាសកល និងការពង្រឹងភាពប្រកួតប្រជែង។ ពាក្យ “យុគសម័យថ្មី” ឆ្លុះបញ្ចាំងពីវិធីសាស្រ្តដ៏សកម្ម និងប្រកបដោយថាមវន្តនៃបេសកកម្មពាណិជ្ជកម្មបច្ចុប្បន្ន និងបង្ហាញពីការប្តេជ្ញាចិត្តរបស់កម្ពុជាក្នុងការសម្រេចឱ្យបាននូវចក្ខុវិស័យឆ្នាំ២០៣០។ មូលបទ “យុគសម័យថ្មីនៃពាណិជ្ជកម្ម ២.០” បន្តគូសបញ្ជាក់យ៉ាងម៉ឺងម៉ាត់បន្ថែមទៀតនូវគោលដៅអភិវឌ្ឍន៍ពាណិជ្ជកម្មថ្មីរបស់កម្ពុជា និងការប្តេជ្ញាចិត្តក្នុងការក្លាយជាតួអង្គសំខាន់នៅក្នុងទីផ្សារពិភពលោក តាមរយៈការតាំងបង្ហាញផលិតផលដែលមានលក្ខណៈពិសេស ការបង្ហាញពីសមត្ថភាពផលិតកម្ម ទំនើបកម្ម ការសម្រួលការនាំចេញ និងការប្រើប្រាស់បច្ចេកវិទ្យាទំនើបនិងចុងក្រោយ បម្រើឱ្យវិស័យពាណិជ្ជកម្ម។
