ភាសាខ្មែរ
English
中文
ព័ត៌មានលម្អិតនៃព្រឹត្តិការណ៍
មូលបទប្រចាំឆ្នាំ៖ «យុគសម័យថ្មី អនាគតរួម» (New Era, Shared Future)
១. ការរៀបចំពន្លាជាតិកម្ពុជា
-
រចនាបថ និងគោលគំនិត៖ ពន្លាជាតិកម្ពុជាត្រូវបានសាងសង់យ៉ាងលេចធ្លោលើផ្ទៃដីទំហំ ១៣២ ម៉ែត្រក្រឡា ដោយរចនាឡើងតាមរចនាបថកម្ពុជាយុគសម័យទំនើប ក្រោមគោលគំនិត «នវានុវត្តន៍ឆ្ពោះទៅរកអនាគត វិទ្យាសាស្ត្រ និងបច្ចេកវិទ្យាធ្វើឱ្យជីវិតកាន់តែប្រសើរ»។
-
ការបែងចែកតំបន់ ៖ ដើម្បីផ្តល់ភាពងាយស្រួល និងបទពិសោធន៍ដ៏ល្អប្រសើរជូនអ្នកទស្សនា ពន្លាជាតិត្រូវបានរៀបចំបែងចែកជា ៤ តំបន់សំខាន់ៗរួមមាន៖ តំបន់តាំងបង្ហាញផលិតផលគុណភាពខ្ពស់ តំបន់វេទិកាសម្តែងសិល្បៈ តំបន់ជំនួបធុរកិច្ច (Business Matching) និងតំបន់ផ្តល់ព័ត៌មានព្រមទាំងភ្លក់រសជាតិផលិតផល។
-
២. ការតាំងបង្ហាញផលិតផលសក្តានុពល
-
ឆ្លៀតក្នុងឱកាសដ៏មានសារៈសំខាន់នេះ គណៈប្រតិភូកម្ពុជាបាននាំយកនូវផលិតផលសក្តានុពល និងផលិតផលសម្គាល់ភូមិសាស្ត្រទំនិញ (GI) ល្បីៗជាច្រើនមុខទៅដាក់តាំងបង្ហាញ ដើម្បីស្វែងរកទីផ្សារអន្តរជាតិ រួមមានជាអាទិ៍៖ អង្ករ គ្រាប់ស្វាយចន្ទី កាហ្វេមណ្ឌលគិរី ម្រេចកំពត ស្ករត្នោតកំពង់ស្ពឺ មីជាតិ និងផលិតផលក្នុងស្រុកដែលមានគុណភាពខ្ពស់ដទៃទៀត។
-
៣. សកម្មភាពសិល្បៈ និងការផ្លាស់ប្តូរវប្បធម៌
-
ដើម្បីលើកស្ទួយកិត្យានុភាពវប្បធម៌ជាតិ និងទាក់ទាញចំណាប់អារម្មណ៍ភ្ញៀវអន្តរជាតិ គណៈកម្មការបានរៀបចំនូវផ្ទាំងទស្សនីយភាពសម្តែងរបាំបុរាណ និងប្រពៃណីខ្មែរ (ដូចជារបាំមណីមេខលា របាំក្រមា និងរបាំបួងសួង) ព្រមទាំងមានការប្រគុំឧបករណ៍តន្ត្រីបុរាណដ៏ពិរោះរណ្តំ (ផ្លុំស្នែង ប៉ីពក ខ្លុយ និងខ្សែដៀវ) ជូនភ្ញៀវកិត្តិយសទស្សនាកម្សាន្តជាប្រចាំថ្ងៃ។
-
៤. លទ្ធផលសម្រេចបានដ៏ត្រចះត្រចង់
-
ការទាក់ទាញភ្ញៀវទស្សនា៖ ជាលទ្ធផលគួរជាទីមោទនៈ ពន្លាជាតិកម្ពុជាទទួលបានការគាំទ្រយ៉ាងខ្លាំង ដោយទាក់ទាញបានភ្ញៀវចូលទស្សនា និងស្វែងយល់សរុបប្រមាណ ៣៣,៧៩០ នាក់។
-
ការផ្សព្វផ្សាយព័ត៌មាន៖ ព្រឹត្តិការណ៍ និងវត្តមានដ៏លេចធ្លោរបស់កម្ពុជានេះ ទទួលបានការចាប់អារម្មណ៍ និងការចុះផ្សាយយ៉ាងទូលំទូលាយពីសំណាក់ស្ថាប័នព័ត៌មានជាតិ-អន្តរជាតិល្បីៗ ដូចជាកាសែត Khmer Times, The Phnom Penh Post ព្រមទាំងបណ្តាញសារព័ត៌មានក្នុងស្រុកជាច្រើនស្ថាប័នទៀត។
សង្ខេបពិព័រណ៍៖
- កាលបរិច្ឆេទ ០៥ - ១០ វិច្ឆិកា ២០២៤
- រយៈពេលពិព័រណ៍ ៦ ថ្ងៃ
- ប្រភេទពិព័រណ៍ ពិព័រណ៍ក្រៅប្រទេស
- ទំនាក់ទំនង ១២៦៦
- ទីតាំង : មជ្ឈមណ្ឌលសន្និបាត និងពិព័រណ៍ជាតិ ទីក្រុងសៀងហៃ សាធារណរដ្ឋប្រជាមានិតចិន
