(អូសាកា, ជប៉ុន)៖ នារសៀលថ្ងៃអាទិត្យ ទី១២ ខែតុលា ឆ្នាំ២០២៥ នៅទីក្រុងអូសាកា ប្រទេសជប៉ុន តបតាមការអញ្ជើញ ឯកឧត្តម សំហេង បូរ៉ា រដ្ឋលេខាធិការ និងជាអគ្គស្នងការរងតំណាងកម្ពុជាសម្រាប់ពិព័រណ៍២០២៥ អូសាកា កាន់សៃ ជប៉ុន បានដឹកនាំក្រុមការងារក្រសួងពាណិជ្ជកម្ម ជួបពិភាក្សាការងារជាមួយ លោក Abdulkareem Aldueb  នាយកជាន់ខ្ពស់ នៃនាយកដ្ឋាន International Participants Country និងលោក KHALID Khayat ជា Country Manager សម្រាប់ប្រទេសកម្ពុជា នៅពន្លាជាតិប្រទេសអារ៉ាប់បីសោអូឌីត។

កិច្ចពិភាក្សានេះ បានផ្តោតសំខាន់លើការបង្កើនទំនាក់ទំនង និងការផ្តល់ព័ត៌មានវឌ្ឍនភាពពាក់ព័ន្ធនឹងការត្រៀមរៀបចំ និងចូលរួម ក្នុងពិព័រណ៍ពិភពលោក EXPO 2030 Riyadh ដែលនឹងប្រព្រឹត្តទៅរយៈពេល៦ ខែ គិតចាប់ពីថ្ងៃទី១ ខែតុលា ឆ្នាំ២០៣០ ដល់ថ្ងៃទី៣១ ខែមីនា ឆ្នាំ២០៣១ នៅទីក្រុងរីយ៉ាត់ ប្រទេសអារ៉ាប់ប៊ីសាអូឌីត។ លោក Abdulkareem Aldueb បានជម្រាបជូនឯកឧត្តមរដ្ឋលេខាធិការ និងក្រុមការងារជ្រាបថា រដ្ឋាភិបាលអារ៉ាប់ប៊ីសាអូឌីត ត្រូវបានជ្រើសរើសជាម្ចាស់ផ្ទះរៀបចំពិព័រណ៍ពិភពលោក EXPO 2030 Riyadh ក្នុងមហាសន្និបាតការិយាល័យពិព័រណ៍អន្តរជាតិ លើកទី១៧៣ កាលពីថ្ងៃទី២៨ ខែវិច្ឆិកាឆ្នាំ២០២៣ កន្លងទៅ។ ទន្ទឹមនោះ គណៈកម្មការរៀបចំពិព័រណ៍ពិភពលោក EXPO 2030 Riyadh បានផ្ញើរលិខិតអញ្ជើញជូន ព្រះរាជាណាចក្រកម្ពុជា ចូលរួមក្នុងព្រឹត្តិការណ៍ខាងលើ តាមរយៈផ្លូវការទូតរួចរាល់ផងដែរ។

ឯកឧត្តមរដ្ឋមលេខាធិការ បានថ្លែងអំណរគុណដល់ លោក Abdulkareem Aldueb និងរដ្ឋាភិបាលអារ៉ាប់ប៊ីសាអូឌីត សម្រាប់ការអញ្ជើញកម្ពុជាចូលរួមក្នុង ពិព័រណ៍ ពិភពលោក EXPO 2030 Riyadh។ បន្ទាប់ទទួលបានលិខិតអញ្ជើញ ក្រសួងពាណិជ្ជកម្ម ក្នុងនាមប្រធានគណៈកម្មការអន្តរក្រសួងដើម្បីរៀបចំ និងចូលរួមពិព័រណ៍ពិភពលោក និងពិព័រណ៍ពាណិជ្ជកម្មអន្តរជាតិ នឹងគោរពស្នើសុំការសម្រេចដ៏ខ្ពង់ខ្ពស់ពីប្រមុខរាជរដ្ឋាភិបាលកម្ពុជា និងបន្តនីតិវិធីជាធរមាន។ ក្នុងឱកាសនោះផងដែរ ឯកឧត្តមរដ្ឋលេខាធិការ និងក្រុមការងារ ក៏បានអញ្ជើញទស្សនា និងស្វែងយល់អំពីការរៀបចំពន្លាជាតិប្រទេសអារ៉ាប់បីសោអូឌីត ក្នុងពិព័រណ៍ពិភពលោក ២០២៥ អូសាកា កាន់សៃ ប្រទេសជប៉ុន។