(ភ្នំពេញ)៖ នាល្ងាចថ្ងៃអង្គារ ទី១៤ ខែមេសា ឆ្នាំ២០២៦ នៅស្តង់យុទ្ធនាការផលិតផលជាតិ #MadeInCambodia បរិវេណស្ពាននាគ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានអញ្ជើញទស្សនា “សួនមុនីហទ័យ និងពិព័រណ៍នគរសង្ក្រាន្ត” អមព្រឹត្តិការណ៍នគរសង្ក្រាន្ត និងដោយមានការអញ្ជើញចូលរួមពីថ្នាក់ដឹកនាំក្រសួងពាណិជ្ជកម្ម សិប្បករ-ផលិតករក្នុងស្រុក និងប្រជាពលរដ្ឋជាច្រើនរូប។ 

សូមជម្រាបជូនផងដែរថា សហភាពសហព័ន្ធយុវជនកម្ពុជា ក្រសួងពាណិជ្ជកម្ម និងក្រសួង-ស្ថាប័នពាក់ព័ន្ធ រៀបចំកម្មវិធី “សួនមុនីហទ័យ និងពិព័រណ៍នគរសង្ក្រាន្ដ” គឺដើម្បីចូលរួមបង្ហាញពីអត្ថន័យ និងនាំមកជូននូវផ្ទាំងទស្សនីយភាពថ្មីៗ ដែលជាការរួមបញ្ចូលគ្នានូវសិល្បៈ វប្បធម៌ ប្រពៃណី ទំនៀមទម្លាប់ ល្បែងប្រជាប្រិយ, ចូលរួមជំរុញចរន្តសេដ្ឋកិច្ចជាតិ, និងមានស្តង់ពិព័រណ៍ផលិតផល សេវាកម្ម និងម្ហូបអាហារ ជាច្រើនផងដែរ។

បន្ថែមលើនេះ ក្រសួងពាណិជ្ជកម្ម ក៏បានរៀបចំ ស្តង់យុទ្ធនាការផលិតផលជាតិ #MadeInCambodia ដើម្បីដាក់តាំងបង្ហាញនូវផលិតផលផលិតនៅកម្ពុជា និងផលិតផលស្ត្រី #MadeByHer ក្នុងគោលដៅបង្កើនភាពប្រកួតប្រជែង ការទទួលស្គាល់ម៉ាក និងការបង្កើនតម្លៃបន្ថែមសម្រាប់ផលិតផលជាតិ និងផលិតផលផលិតដោយស្ត្រី សំដៅបង្កើនការជ្រៀតចូលទីផ្សារ និងជំរុញការប្រើប្រាស់ផលិតផលជាតិ ឈានទៅការពង្រីកឱកាសក្នុងការនាំចេញទៅកាន់ទីផ្សារតំបន់ និងសកលលោក។ 

គួរបញ្ជាក់ផងដែរថា កម្មវិធី “សួនមុនីហទ័យ និងពិព័រណ៍នគរសង្ក្រាន្ត” គឺជាកម្មវិធីអមព្រឹត្តិការណ៍នគរសង្ក្រាន្ត ដែលប្រព្រឹត្តទៅពីថ្ងៃទី១៤-១៩ ខែមេសា ឆ្នាំ២០២៦ នៅបរិវេណសួនច្បារស្ពាននាគវត្តភ្នំ។ អាស្រ័យហេតុនេះ ក្រសួងពាណិជ្ជកម្ម សូមគោរពអញ្ជើញ បងប្អូនប្រជាពលរដ្ឋ អញ្ជើញចូលរួមព្រឹត្តិការណ៍នគរសង្ក្រាន្តនេះ ឱ្យបានច្រើនកុះករ។

#យទ្ធនាការផលិតផលជាតិ
#យទ្ធនាការផលិតផលស្ត្រី
#MOC2026
#MadeInCambodia
#MadeByHer