(ខឹឡូញ, អាល្លឺម៉ង់)៖ នាថ្ងៃច័ន្ទ ទី៦ ខែតុលា ឆ្នាំ២០២៥ នៅទីក្រុងខឹឡូញ ប្រទេសអាល្លឺម៉ង់ ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ ជាមួយឯកឧត្តម ណាំ លីណាល់ និងលោកជំទាវ សុមេធ សុមនា អនុរដ្ឋលេខាធិការ បានជួបពិភាក្សាការងារជាមួយ Dr. Doktor René Vossen នាយកទូទៅនៃអង្គភាព sequa gGmbH និងលោកស្រី Doktor Julia Bellinghausen ប្រធានគម្រោង Import Promotion Desk (IPD)។

កិច្ចប្រជុំនេះ ធ្វើឡើងក្នុងគោលបំណងពង្រឹងកិច្ចសហប្រតិបត្តិការរវាងក្រុមការងារជំរុញការនាំចេញ និងអង្គភាព sequa/IPD ដើម្បីទាញយកការគាំទ្រផ្នែកបច្ចេកទេស សំដៅជំរុញផលិតផលនាំចេញរបស់កម្ពុជាឱ្យមានសមត្ថភាពប្រកួតប្រជែង និងអនុលោមតាមស្តង់ដារអន្តរជាតិ ព្រមទាំងដើម្បីអភិវឌ្ឍកម្មវិធីជំរុញការនាំចេញនានា និងការពង្រឹងសមត្ថភាពក្រុមហ៊ុនក្នុងការនាំចេញទៅកាន់ទីផ្សារអឺរ៉ុប ផងដែរ។

បន្ថែមពីនេះ កិច្ចសហការរវាងក្រុមការងារជំរុញការនាំចេញ និង sequa/IPD នឹងបន្តកាន់តែជិតស្និទ្ធ ដើម្បីលើកកម្ពស់ផលិតផលកែច្នៃកសិកម្ម និងអាហារកែច្នៃរបស់កម្ពុជា ឱ្យឈានចូលទីផ្សារអន្តរជាតិ តាមរយៈការពង្រឹងផ្អែកលើគុណភាព ស្តង់ដារ និងភាពច្នៃប្រឌិត។

ក្នុងថ្ងៃនេះដែរ ឯកឧត្តមរដ្ឋលេខាធិការ ក៏បានបន្តដឹកនាំគណប្រតិភូមកម្ពុជាចូលរួមក្នុងសន្និសីទស្រូវអន្តរជាតិលើកទី៧ (7th Eurofins ANUGA Rice Conference 2025) ដែលរៀបចំដោយក្រុមហ៊ុន Eurofins Dr. Specht Express Testing & Inspection GmbH នៅសាលពិព័រណ៍ ANUGA។

សន្និសីទនេះ បានប្រមូលផ្តុំអ្នកជំនាញ និងតំណាងវិស័យស្រូវអង្ករពីទូទាំងពិភពលោក ដើម្បីពិភាក្សាអំពីឱកាស និងបញ្ហាប្រឈមនៃពាណិជ្ជកម្មស្រូវអង្ករអន្តរជាតិ។ ក្នុងចំណោមវាគ្មិនសំខាន់ៗ ក្នុងសន្និសីទនេះ ក៏មានឧកញ៉ា ឡាយ ឈុនហួរ ប្រធានសហព័ន្ធអង្ករកម្ពុជា បានធ្វើបទបង្ហាញអំពីស្ថានភាពនៃការនាំចេញអង្ករកម្ពុជា និងការអភិវឌ្ឍវិស័យផលិតកម្មស្រូវអង្ករកម្ពុជា ផងដែរ។