(ខឹឡូញ, អាល្លឺម៉ង់)៖ នាថ្ងៃអង្គារ ទី៧ ខែតុលា ឆ្នាំ២០២៥ នៅទីក្រុងខឹឡូញ ប្រទេសអាល្លឺម៉ង់ ឯកឧត្តម សំហេង បូរ៉ា រដ្ឋលេខាធិការ និងជាប្រធានក្រុមការងារជំរុញការនាំចេញ នៃក្រសួងពាណិជ្ជកម្ម បានជួបពិភាក្សាការងារ ជាមួយក្រុមហ៊ុន Comexposium Group ដែលជាអង្គភាពរៀបចំព្រឹត្តិការណ៍នានានៅលើពិភពលោក និងជាអ្នករៀបចំពិព័រណ៍អន្តរជាតិ SAIL Paris។

កិច្ចពិភាក្សានេះ បានផ្តោតសំខាន់លើការបង្កើនទំនាក់ទំនង និងកិច្ចសហការជាមួយក្រុមហ៊ុន Comexposium Group ដើម្បីត្រៀមរៀបចំពន្លាជាតិកម្ពុជា (Country Pavillion) នៅគ្រោងនឹងរៀបចំនៅក្នុងពិព័រណ៍អន្តរជាតិ SIAL Paris 2026។

ក្នុងឱកាសនោះ ឯកឧត្តមរដ្ឋលេខាធិការ បានលើកឡើងពីសារៈសំខាន់ក្នុងការរកទីតាំងល្អមួយសម្រាប់រៀបចំពន្លាជាតិកម្ពុជា ដើម្បីធានាថាការចូលរួមរបស់កម្ពុជានាពេលខាងមុខ នឹងទទួលបាននូវភាពលេចធ្លោ បង្ហាញអត្តសញ្ញាណជាតិ និងផលិតផលសក្ដានុពលកម្ពុជាដែលមានគុណភាពខ្ពស់ ជូនសាធារណជនបានទស្សនា។

ឯកឧត្តមរដ្ឋលេខាធិការ បញ្ជាក់ថា SIAL Paris (Salon International de l'Alimentation គឺជាពិព័រណ៍ឧស្សាហកម្មម្ហូបអាហារ និងភេសជ្ជៈដ៏ធំបំផុតមួយលើពិភពលោក ហើយធ្វើឡើងជារៀងរាល់ពីរឆ្នាំម្ដង (នៅថ្ងៃទី ១៧ ដល់ ២១ ខែតុលា ឆ្នាំ២០២៦) ដោយបានដើរតួនាទីយ៉ាងសំខាន់ក្នុងការតផ្សាភ្ជាប់ទីផ្សារសកល ដ៏ធំមួយ មានអ្នកចូលរួមតាំងពិព័រណ៍មកពីជាង ២០០ប្រទេស រួមទាំងអ្នកទិញលំដាប់កំពូល និងវិនិយោគិនសំខាន់ៗ ផងដែរ។

ឯកឧត្តមរដ្ឋលេខាធិការ សង្កត់ធ្ងន់ថា ការចូលរួមរបស់កម្ពុជាជាមួយនឹងការរៀបចំជាពន្លាជាតិ នឹងក្លាយជាយន្តការផ្សាភ្ជាប់ទីផ្សារ និងតាំងបង្ហាញពីការរួបរួម និងអត្តសញ្ញាណជាតិ នៃវិស័យកសិ-ចំណីអាហារ ដែលជួយបង្កើនភាពជឿជាក់ និងទាក់ទាញចំណាប់អារម្មណ៍អ្នកទិញមកលើផលិតផលសក្ដានុពលដូចជា អង្ករ ម្រេចកំពត ស្ករត្នោត និងផលិតផលកែច្នៃដែលមានគុណភាពខ្ពស់ដទៃទៀតទៅកាន់ទីផ្សារអន្តរជាតិ ជាពិសេសទីផ្សារអឺរ៉ុប ខណៈពេលដែលពិព័រណ៍នេះក៏ជា មជ្ឈមណ្ឌលនវានុវត្តន៍ សម្រាប់ស្វែងយល់ពីនិន្នាការ បច្ចេកវិទ្យា និងស្តង់ដារគុណភាពខ្ពស់បំផុតដែលចាំបាច់សម្រាប់ការបង្កើនសមត្ថភាពប្រកួតប្រជែងផងដែរ។

សូមជម្រាបជូនថា ក្នុងថ្ងៃដដែលនេះ ឯកឧត្តមរដ្ឋលេខាធិការ ក៏បានបន្តជួបពិភាក្សាការងារជាមួយ លោកស្រី Imane Cherifi អ្នកសម្របសម្រួលកម្មវិធី United Kingdom Trade Partnerships (UKTP) នៃអង្គភាព ITC និង លោក ដួង សារ៉ាក់ អ្នកសម្របសម្រួលជាតិរបស់កម្ពុជា សម្រាប់កម្មវិធី UKTP/ITC អំពីការពង្រឹងសហការផ្នែកបច្ចេកទេស និងកសាងសមត្ថភាព ដើម្បីជំរុញការបង្កើនតម្លៃបន្ថែម និងស្តង់ដារផលិតផលនាំចេញរបស់កម្ពុជា ឱ្យអាចប្រកួតប្រជែងបានលើទីផ្សារអន្តរជាតិ ផងដែរ។